VIFO VYA WATOTO,WAJAWAZITO VYAPUNGUA TANZANIA.

Serikali  imesema idadi ya vifo vya wajawazito na watoto nchini vimepungua wakati wa kujifungua kutoka vifo 578 sawa na asilimia 28 hadi kufikia 454 (asilimia 20) kwa mwaka.

Kaimu Mganga Mkuu, Dk. Donad Mmbando, alisema hayo alipokuwa akizungumza na waandishi wa habari jana, jijini Dar es Salaam.

Alisema wadau wa Wizara ya Afya na Ustawi wa Jamii walikutana ili kujadili mpango wa huduma ya Kiteknolojia kwa Mama na Mtoto kwa lengo la kuboresha huduma ya  uzazi wa mpango.

 “Tumeamua kutoa elimu kwa akina mama na watoto kupitia taarifa zitakazotolewa na wizara juu ya imani potofu za kishirikina na ugumba,” alisema Dk. Mmbando.

Alisema mpango huo utasaidia wananchi wa vijijini kufahamu huduma hizo mahali zinapoweza kupatikana, hususan katika vituo vya afya.

Dk. Mmbando alisema wananchi wengi wa vijijini wamekuwa na mtazamo tofauti juu ya   uzazi wa mpango, kwa kuwa unapunguza ongezeko la idadi watoto ndani ya familia.

Hata hivyo, alisema wamejipanga kutoa elimu ya kutosha mjini na vijijini ili wananchi waondokane na imani potofu.
     habari kutoka gazeti la nipashe 13/11/2013